– Ваҡытында беҙҙең төбәктә һунарсылар күп булды. Йомаштан Ғәле Райманов, Ҡаһарман Райманов ағайҙар етәкселегендәге 4-5 һунарсы бергә йөрөнө. Бынан тыш Ишбирҙенән Өмөтҡужа Сыртланов яңғыҙы ғына ла бүрегә ташлана торғайны. Беренсе Этҡолдан Фирғәт Вәлитов та бүре аулаусы булараҡ танылыу алған ине. Хәҙер уның юлын улы Фәнил Вәлитов дауам итә. Уға бүре һуғып алыу нескәлектәрен үҙем өйрәттем.

Ҡайһы ваҡыт 14 кеше бергә бүре һуғып алыуға сығып китә торғайныҡ. Ағайым Миңлебай Дәүләтбаев, ҡустым Урал Дәүләтбаев, Рафаэль Сәйетов, Әйүп Байымов, Нурғәле Юлғотлин, Әхәт Ҡарамырҙин, Абрар Мырҙабулатов, Ғәйнулла Ғөбәйҙуллин, Ғүмәр Иҫәндәүләтов, Рамаҙан Аҡсарин, Рамаҙан Истәков, Самат Йәрмөхәмәтовтар менән бергә йөрөнөк. Күп осраҡта бер туған ағайым Миңлебай Дәүләтбаев менән һунар итә инек. Бындай осраҡта эргәңдә ышаныслы кешең булыуы мөһим. Һуңынан ҡустыларым Хәмзә Үҙәнбаев, Айса Үҙәнбаевтарҙы ла был ҡомарға өйрәтеп алдыҡ.
Бер көн шулай 14 һунарсы бергә бүре һуғырға сығып киттек. Бара торғас, уларҙың эҙҙәренә төштөк. Бүреләр ҙә беҙҙе һиҙҙе һәм төрлөһө төрлө яҡҡа сәсрәп китте. Тоҫморлап алдыҡ та, Ғүмәр Иҫәндәүләтов менән береһенең юлына ҡаршы төштөк, ҡамауға алдыҡ. Ысынлап та, бүре беҙҙең өҫкә килеп сыҡты. Тауыштарыбыҙҙы ишетеп, башҡалар ҙа килеп етте. Бүрене ҡыуып етеп, суҡмарым менән һуғып ебәргәс, ул тәгәрәп барып ятты. Үлгән икән, тип яҡынлаһам, тере булып сыҡты. Башына баҫыуым булды, әйләнеп килеп миңә ташланды. Бүре лә һуңғы һулышына тиклем йәшәү өсөн көрәшә. Рафаэль Сәйетов был бүрене, беҙҙең аралағы иң оло һунарсы булараҡ, Әйүп Байымовтың атына тағып алып ҡайтырға тәҡдим индерҙе. Башҡалар ҙа ҡаршы булманы.
Ә инде икенсе юлы шулай һунарға сыҡҡанда, был бүре кемдеке, тигән бәхәс сыҡты. Атайым өйрәтә торғайны, шундай осраҡта, атыңдан һикереп төш тә, бүренең ҡолағын ҡырҡып ал. Кемдә ҡолаҡ – бүре лә уныҡы, тип. Шулай эшләнем дә. Уныһын иһә Миңлебай ағайымдың атының ҡойроғона тағып алып ҡайттыҡ.

«Атайым һунарсылар союзында тороп, мылтыҡ алһа ла, уны ҡулланырға яратманы. Яурынында тағып йөрөтһә лә, һәр ваҡыт бүре, айыу, һеләүһендәргә үҙе эшләп алған таяғы менән ташлана ине.
Атайым бүрене туҡмап, шаңҡытып ала ла, тарма еп менән уның ауыҙын тегеп, Буян атының ҡойроғона тағып, урам буйлап һөйрәтеп алып ҡайта торғайны. Бар халыҡ, ҡыҙыҡ күреп, беҙгә йыйыла торғайны. Атайым ул йәнлектәрҙең характерын яҡшы белде. Бүре баҫтырып йөрөп, уның бер үк урынды нисә тапҡыр урарын да, ҡайһы тирәгә килеп сығырын да алдан тоҫмаллай торғайны. Хәтеремдә, бер тапҡыр бүрене алып ҡайтып, усаҡлыҡҡа индереп бикләне лә, икенсеһенә китте. Әсәйем менән бергә барып инһәк, бүре мейес артына инеп йәшенде. Күрәһең, атайымдың шул ҡәҙәр туҡмауынан ҡурҡҡан бүре ул килеп инде, тип уйлағандыр, моғайын.

Ә бер юлы атайым баҫтырып килгән бүре, унан ҡасып, хатта ауылға килеп инә. Ауыл уртаһында йәшәгән Мөршиҙә инәйҙәрҙең хужалығына үтеп, бәҙрәфенә инеп йәшенә. Уны шунда тотоп алалар.
Атайым айыу менән һеләүһендәргә лә шул ике метрлыҡ таяғы менән һунар итте. Бер көн һыйыр көтөп йөрөгәндә, айыу килеп сыға һәм бер һыйырға йәбешә. Быны күреп ҡалған атайым, таяғы менән һуғып, малды һалдырып ала. Асыуы килгән айыу һуңынан уның үҙенә йәбешә. Атайым алыша торғас, айыуҙың өҫтөнә менеп ултырып, бер ҡулы менән муйынына баҫа, ә икенсеһе менән кәҫәһендә йөрөткән бәкеһен алырға маташа. Шул ваҡытты оҫта файҙаланып, айыу атайымды йығып ҡаса.

Икенсе осраҡта атайым аты Буян һәм эте Шарик менән һунарға сыға. Ауылдан алыҫ китеп тә өлгөрмәй, эте ағасҡа ҡарап өрә башлай. Ә унда һеләүһен ултырған була. Таяғы менән һелтәнеп тә ала алмағас, балта менән ул ултырған ағасты тумыра башлай. Ләкин һеләүһен ҡолап барған ағастан икенсеһенә ырғый. Ул ағасты инде ялан яҡҡа ҡаратып ҡолата. Шунда һеләүһенде һуғып алыуға өлгәшә».