«Боронғо станокта туҡырға өйрәнергә теләк барлыҡҡа килде, әммә беҙ станокта эшләүҙең барлыҡ нескәлектәрен белгән оҫтаны таба алмай инек. Был һөнәрҙе белеүсе Ҡыҙыл Еҙем ауылынан табылды. Антипина Мария Ивановна минең тәҡдимгә ғәжәпләнһә лә, туҡыу станогын йыйыуҙан алып эш барышын тотошлайы менән күрһәтергә риза булды. Шулай итеп беҙ был һөнәрҙе үҫтерә башланыҡ.»

Еп бер-береһе менән билдәле арауыҡта торған күсәргә урала. Уңдан – бер күсәр, (уға ептең башы бәйләнә), һул яҡтан – ике күсәр йәнәш (уға еп һигеҙ һаны рәүешендә урала). Епте тигеҙ итеп урарға тырышырға кәрәк: буш та булмаһын, тарттырып та тормаһын. Урап бөткәндән һуң еп кәтүктән ҡырҡыла һәм беренсе күсәргә бәйләнә.

Баҫма иҫәпләү өсөн өҫкө буҫтау алына. Баҫмала 15 еп, һәр баҫма еп менән бәйләнә. Баҫманы иҫәпләү ҡылыс тештәренең һанына бәйле (мәҫәлән, 240 теш булһа, 8 өҫкө һәм 8 аҫҡы баҫма кәрәк, уларҙың һәр береһе 15 ептән торорға тейеш).

«Һигеҙ» рәүешендә туҡыу, эш барышында ул күсмәһен өсөн уны тейешенсә нығытырға кәрәк. Бының өсөн кизе-мамыҡ бау ҡулланыла.

Тәү сиратта буҫтауҙы бау ярҙамында башланғыс беркетмәгә нығытырға кәрәк. Унан буҫтау ипләп кенә ысҡындырыла ла уң яҡ ҡул суғына эленә. Һул ҡул менән буҫтауҙы ҡоласлап һалғас, уң ҡул менән барлыҡҡа килгән элмәктең үҙәгенән тарттырыла. Һәр яңы аҙым шул рәүешле бөткәнсе ҡабатлана.

Иң тәүҙә тығыҙлау ҡоролмаһын сисеп, ептәрҙе алырға, тәбәлдеректе ысҡындырырға кәрәк. Тығыҙлау ҡоролмаһы урынына ҡуйыла. Станок үҙәгенә ярҙамсы өсөн ултырғыс ҡуйыла, ырғаҡ әҙерләнә. Артабан «толомдан» бау алына. «Һигеҙ» рәүешендәге ептәр тығыҙлау ҡоролмаһының аҫҡы өлөшөнә беркетелә.

Еп ҡылыстың 1-се тешенән бирелә. Ярҙамсы әҙерләп ҡуйылған ырғаҡ ярҙамында ҡылыстың икенсе яғынан ептәрҙе тартып сығара һәм уларҙы һул ҡул суғына элә.

Төп өлөштө күсәргә беркетеү өсөн ептәрҙе күсәрҙең оҙонлоғондағы махсус таяҡҡа бәйләргә кәрәк. Күсәргә ептәр эләктерелгән махсус буҫтау беркетелгән. Тәүҙә таяҡҡа буҫтау ебен бәйләйҙәр, унан бер нисә төп епте. Еп күләме самалап һайлана. Шулай итеп, буҫтау һәм ептәрҙең төп өлөшөн алмашлап, ептәрҙең төп өлөшө билдәләнә. Унан һуң күсәр тартыла. «Һигеҙ» төп өлөшкә махсус яҫы таҡталар ярҙамында беркетелә: беренсе рәт өҫкө һәм аҫҡы ҡатлам еп араһынан үтә һәм өҫкө ҡатлам өҫтөнән бәйләнә. Икенсе таҡта шул рәүешле ҡуйыла һәм нығытыла, әммә был юлы ҡылыс яғынан. Буҫтауҙағы «Һигеҙ» әҙер!

Тәүҙә баҫмалар һүтелә. Унан төп өлөшө төҙәтелә: ярҙамсы төп өлөштө тарттыра, ә оҫта, үҙәктәге таяҡты һуҡҡылап, ептәрҙең буталмауын һәм тигеҙ тартылыуын күҙәтә. Хәҙер төп өлөштө күсәргә тартырға була. Ярҙамсы толомдо үҙәк аша үткәреп оҫтаға бирә. Оҫта толомдо уҡлауға ҡуйып, таяҡты аяғы ярҙамында тотоп, станок күсәрен әйләндерә. Артабан толомдо бер аҙ һүтәләр һәм шул уҡ хәрәкәттәрҙе яңынан башлайҙар.

Төп өлөш күсәргә тартылғандан һуң, уны беркетергә кәрәк. «Һигеҙ» таҡталары үҙ-ара ептәр менән нығытыла. Унан бауҙар менән эленә. Төп өлөштөң өҫкө һәм аҫҡы буҫтау тоташҡан урыны ҡайсы менән ҡырҡыла. Ептәр ҡылыстан алына. Эш тамамланғас тығыҙлау ҡоролмаһы ҡылыстан алына һәм көрөҫ урынлаштырыла.

Һәр көрөҫтә 120-шәр еп була. Күп ремизлы туҡыу булғанда, һәр көрөҫтә ептәрҙең һаны 60 булырға тейеш.1-се көрөҫтән һәм 1-се рәттән түңәрәк эшләнә, уның аша ырғаҡ ярҙамында төп өлөштөң беренсе ебе сығарыла, унан 2-се көрөҫ менән дә шулай уҡ эшләйҙәр. Шулай итеп, 1-се һәм 2-се көрөҫ алмаш килә. Ептәрҙе тултырғандан һуң таяҡтарҙы сисәләр һәм ҡылысҡа тығыҙлау ҡоролмаһы йәнә урынлаштырыла.

Көрөҫкә ҡуйылған һәр епте махсус ырғаҡ ярҙамында ҡылыстың һәр тешенән сығаралар.

Тәү сиратта буҫтауҙы осҡа беркетергә кәрәк. Унан элмәк эшләнә, уның аша киләһе элмәк һуҙыла. Буҫтауҙың аҙағына тиклем шулай эшләнә.