Питрау (йәки икенсе төрлө ‒ Питравка) ‒ йәштәр уйындары һәм әйлән-бәйләненең яҙғы-йәйге байрамы. Уны сыуаштар 29 июнь (12 июль) Изге Петр һәм Павел хөрмәтенә билдәләй.

Сыуаштар инде оҙаҡ быуаттар дауамында ултыраҡ тормош алып бара. Ер һөрөүсенең календары һәр ваҡыт ҡояш торошо һәм ул билдәләгән осор менән бәйле булған.

Һуңғы быуаттарҙа сыуаштарҙың байрамдарында православие сағылыш тапҡан. Сыуаштарҙың календарь байрамдары астрономик йылдың төп һынылыш осорона ‒ ҡышҡы һәм йәйге ҡояш боролошона, көҙгө һәм яҙғы ҡояш торошона тура килтерелә.

Билдәле бер көндө сыуаштар йәшәгән иң ҙур ауылдарҙың береһенә тирә-яҡтан йәштәр йыйыла. Һәр ауыл эргәһендәге болонда, сауҡалыҡ янында йәки урман аҡланында йәштәргә “ваиа", “пуха", “тапа" тип йөрөтөлгән йыйылыштарҙы уҙғарыу өсөн даими урын булдырыла.

“Ваиа" көнөндә музыканттар өсөн эскәмйә ҡуйыла. Урманһыҙ урындарҙа эскәмйә янына бер нисә яңы ағас ҡаҙып ултыртып, уларҙы төрлө төҫтәге таҫмалар менән биҙәгәндәр. Төшкә табан был урынға йәштәр йыйыла башлай.

Тәм-том, ваҡ-төйәк, уйынсыҡтар һатыусылар ҙа килә.

Урманда ҡыҙҙар йырлай, сәскә йыя, сәскә бәйләмдәре үрә, ә егеттәр берәй ағас һайлай. Уның тирәләй әйлән-бәйлән уйнайҙар, сәскәләр һәм таҫмалар менән биҙәйҙәр. Һуңынан ағасты ҡырҡып, ауылға алып килеп, уйын һәм әйлән-бәйлән ойоштороу өсөн билдәләнгән махсус урынға ҡуялар. Ауылға барышлай ҡыҙҙар күҙ бәйләп күрәҙәлек ҡыла. Йылға буйында, сәскә бәйләмдәрен һыуға ташлап, уларҙың ҡайһы яҡҡа йөҙөп китеүен күҙәтәләр. Әйлән-бәйлән, ғәҙәттә, ауыл ситендә башҡарыла. Бының өсөн бейегерәк урын һайлағандар. Тау башына ағас ултыртып, уның тирәләй әйлән-бәйлән уйнағандар.

Уяв осоронда әйлән-бәйлән көн һайын иртәнән алып кискә тиклем тынмай.
Кисен ағас төбөндә усаҡ яғып ебәрәләр, тирә-яҡта бер нисә түңәрәк барлыҡҡа килә.
Айырыуса, йома һәм йәкшәмбе көндәрендә әйлән-бәйлән байрамса, сағыу үтә.
Петр көнө (Питравка) етеү менән йәштәр байрамдары тамамлана.

Питрауҙа бөтөн ауыл һуңғы әйлән-бәйлән уйынына йыйыла. Төндә Уявты оҙатыу өсөн, бөтәһе лә ауылдың көнбайыш ситенә сыға һәм хушлашыу усағы тирәләй быйылғы йылда һуңғы әйлән-бәйлән уйнай.
Төн уртаһында йәштәр йырлашып, музыка уйнатып байрам ағасын зыяратҡа алып китә. Кире ҡайтҡанда йырларға ярамай. Уявтың башланыуына һәм тамамланыуына арналған махсус йырҙар бар. Ф. П. Павлов эшкәртеүендәге «Торнаҡай» Уяв оҙатыусыларының йырына миҫал булып тора. Уявты тантаналы оҙатҡандан һуң әйлән-бәйлән йырҙары башҡарылмай.
Игенсенең мәшәҡәттәре менән бәйле еңел булмаған хеҙмәт һәм йолалар ваҡыты етә.

Питрау байрамы көндө мөмкинлектәре сикле булған, мохтаждар өсөн мул ризыҡлы табын әҙерләгәндәр. Байрам өҫтәленә күршеләр, туғандар, ярлылар һәм сәйәхәтселәр саҡырылған. Ҡайһы бер урындарҙа ҡәйнә кейәүен сыр менән, ә кейәү ҡәйнәһен бар халыҡ араһында тәм-том менән һыйлау йолаһы бар. “Крестный"ҙар бер-береһенә бойҙай бәлештәре бүләк иткән.

Питрау көнө ‒ иҫәп нөктәһе

Төрлө килешеүҙәр, хеҙмәткәрҙәрҙе яллау көнө ошо ваҡыттан иҫәпләнә башлай. Йыш ҡына Питрауҙа йәрминкәләр ойошторолған. Ошо көндән һуң бесән саба башлайҙар. Был йәһәттән махсус ҡорбан килтереү, доға ҡылыуҙар башҡарылған.

Питрау көндәре йәштәр һәм балалар өсөн айырыуса күңелле мәл. Сөнки ауыл хужалығында барған эштәрҙең күбеһе тамамланған. Был ваҡытта йәрминкәләр йышыраҡ уҙғарыла.

Июндең икенсе яртыһынан алып июль башына тиклем сыуаштарҙа туйҙар үтә. Шуға бәйле байтаҡ урындарҙа был ваҡыт «ҡыҙ айы» тип атала. Туйҙар ҡайһы берҙә йылдың йәйге ҡояш торошо ваҡытына тура килгән, был иһә ошо осорға байрам төҫөн биргән. Сыуаштарҙа туйҙарҙың күбеһе сабынлыҡ алдынан үткәрелгән, ә туй тантаналары тамамланғас, йәш егет бесәнгә сыҡҡан һәм ураҡта ҡатнашҡан.