1) Мунсаға ныҡлы ашағандан һуң барырға ярамай. Ас барыу ҙа кәңәш ителмәй. Иң яҡшыһы, алтын урта – еңелсә генә ашау.
2) Мунсаға ингәс тә, йылымыс һыу менән сайынырға һәм яҡшылап ҡоронорға кәрәк. Был яҡшыраҡ тирләргә мөмкинлек бирәсәк.
3) Башҡа эҫе үтмәһен өсөн баш кейеме кейер кәрәк.
4) Тән эҫегә яйлап күнегергә тейеш. Шуға күрә эҫене лә әҙләп һалырға, башта эләүкәнең аҫҡы яғында ултырып тороп, һуңынан ғына өҫкә менеү кәңәш ителә.
5) Эләүкәлә һуҙылып ятыу иң яҡшыһы, сөнки мускулдар йомшара, ә быу тәнде йылыта.
6) Мунсала быу дөрөҫ һәм файҙалы булһын өсөн, таштарға ябай һыу урынына төрлө үләндәр төнәтмәһе һибергә, ә еңел һәм йомшаҡ булһын тиһәгеҙ, ҡайнар һыуҙы ташҡа әҙләп кенә һирпергә кәрәк. Һыуыҡ һыуҙан быу ауырая һәм еүешләнә, тын алыуы ауырлаша.
7) Мунсала махсус тын алыу күнекмәләре яһарға мөмкин. Мунсаға ингәс тә, ауыҙ аша тәрән итеп тын алырға һәм танау аша сығарырға. Икенсе тынды танау аша алып, танау аша сығарырға. Тынды ике-өс секундҡа тотоп тороп, турайырға һәм танау аша сығарырға. Был күнегеүҙе тынды һигеҙ секундҡа тиклем тотоп тора алырлыҡ итеп ҡабатларға. Төрлө үлән төнәтмәләрен еҫкәү ҙә ныҡ файҙалы.
8) Мунса ярҙамында ябығырға ла мөмкин, тик уның өсөн бер тапҡыр ғына мунса инеү етмәй, ябығам тиһәң, мунсаға даими йөрөргә кәрәк. Был маҡсатта быуҙың ҡоро булыуы яҡшыраҡ һөҙөмтә бирә, сөнки организмды эҫенән һаҡлайым, тип, май тулыһынса янып бөтә.
9) Мунсала дөрөҫ сабыныу ҙа бик мөһим. Иң тәүҙә еңел, һалмаҡ хәрәкәт менән аяҡ табаны, аяҡтар, оса, арҡа һәм ҡулдарҙан өҫтән аҫҡа һәм аҫтан өҫкә ҡарай бер нисә тапҡыр үтергә. Бынан һуң, лимфатик төйөндәр урынлашҡан тубыҡ аҫтындағы соҡор, сат өлкәһен һәм ҡултыҡ аҫты соҡорона теймәй генә миндек менән тәнде сабырға. Иң һуңынан, миндек менән ҡул, бил, тубыҡ һәм аяҡ табандарына баҫып торорға. Бындай массаж ҡан әйләнешен көсәйтә, күҙәнәктәрҙе аса һәм һөҙөмтәлә тәндән тир, шлактар күберәк сыға.
10) Мунса менән дөрөҫ ҡулланғанда ғына ул кәйефте күтәрә, тәнде сафландыра, хәл-торош күпкә яҡшыра, эшкә һәләтлелек арта. Унда кәрәгенән артыҡ булыу, киреһенсә, хәлһеҙләндерә, баш ауыртыуы һәм насар кәйеф барлыҡҡа килә. Мунсаға йыш йөрөргә ярамай, ете-ун көнгә бер тапҡыр барһаң, шул етә.
Иң мөһиме, мунса ингәндә насар уйҙар уйламай, ҡабаланмай, яйлап, тыныс ҡына инергә. Үләндәрҙән төнәтмәләр эшләп, тоҙ менән ышҡынып, бал менән ыуынып, хушланып таҙарыныр кәрәк. Шулай итмәһәң, уның файҙаһы булмаясаҡ.

Башлыса үләндәрҙе сәскә атҡан мәлендә, иртәнге сәғәттәрҙә, ҡоро көндә йыялар. Үләндәрҙе һалҡын, еләҫ ерҙә элеп киптерәләр. Әлбиттә, ҡағыҙға йә сепрәккә лә һалырға була, тик был осраҡта уларҙы әйләндереп, болғап, аҫтындағы япманы алыштырып торорға кәрәк. Кипкән үләндәрҙе сепрәк моҡсайҙарҙа һаҡлау яҡшыраҡ. Һәр моҡсайҙы яҙып, билдәләп ҡуйыу һәр береһен асып, кәрәкле үләндәрҙе эҙләп ултырмаҫ өсөн яҡшы. Үләнде быяла һауытта ла һаҡларға була. Моҡсайҙың да, һауыттың да таҙа булыуы мөһим. Был осраҡта үлән бәшмәк ауырына дусар булмаясаҡ.
Мунсала үләндәрҙе өс ысул менән ҡулланалар: төнәтмә рәүешендә, миндеккә ҡушып бәйләп һәм бәйләмдәр яһап.
Төнәтмәгә ултырыу, уның менән сайыныу һәм ташҡа һирпеү, үләнле, баллы сәй эсеү –комлекслы итеп дауаланыу ул.
“Андыҙ барҙа ат үлмәҫ, ирәүән барҙа ир үлмәҫ", – ти халыҡ мәҡәле. Андыҙ туҡһан туғыҙ төрлө сирҙән дауа, ти ололар. Андыҙҙы ерҙән бушлай ғына алырға ярамай, хәйер итеп, ергә икмәк һынығы, тоҙ һалып ҡалдырырға кәрәк, тип тә киҫәтәләр. Андыҙ быуы йүткереүҙән ныҡ файҙалы. Һөйәк һыҙлаһа, уның тамырын алып, картуф менән бергә бешереп, һыҙлаған ергә һалып, һуңынан төнәтмәһе менән сайып ҡуйырға кәрәк. Андыҙ ҡайнатмаһын эсеү ҙә ашҡаҙан, эсәк ауыртҡанда файҙалы. Өс андыҙ тамырын йыуып, ҡырып, турап, өс литр һыуҙа бер сәғәт ҡайнатаһың. Шул ҡайнаған һыуға ике аш ҡалағы шәкәр өҫтәп, бер аҙ төнәтәһең. Шунан көн дә сәй кеүек эсәһең, ашар алдынан да, һуңынан да мөмкин. Кешенең бөтә ғәмәлен таҙарта. Эс, бауыр, бөйөр, баш ауыртыуынан да бик һәйбәт, шеште лә ҡыуа андыҙ һыуы. Ә бешкән андыҙҙы алып, аяҡ быуынына бәйләп ятһаң, һыҙлау бөтә.
Аяҡ һыҙлаһа, дегәнәк япрағын йылы һыуҙа сылатып, һул яғы менән ябыр кәрәк. Елкәләге шештән ҡотолоу өсөн мунсала бал+тоҙ ҡатнашмаһы менән ыуалап, мунсанан ҡайтҡас, керән япрағының һуң яғын ябып, өҫтөнә берәй сепрәк ҡаплап төнгөлөккә ҡалдырыу ҙа етә.
Целлюлиттан һәм шлактарҙан ҡотолоу өсөн мунсала ҡурай еләге төнәтмәһе эсергә мөмкин. Бының өсөн 2 аш ҡалағы кипкән ҡурай еләген 1 стакан ҡайнар һыу ҡойоп, 15-20 минут тоторға. Файҙаһы нығыраҡ тейһен өсөн, төнәтмәне ҡурай еләге менән бергә ҡушып эсергә. Тик бөйөрҙәре ауыртҡандарға быны эшләргә ярамай.
Аяҡтар тирләп йонсотҡанда имән япраҡтары һәм ҡайыры төнәтмәһе килешә.